អត្ថបទត្រិះរិះ៖ «កុំធ្វើខ្លួនឱ្យដូចរស់នៅក្នុងប៉ាឆាកប់សព»
- 2017-11-08 05:00:45
- ចំនួនមតិ 0 | ចំនួនចែករំលែក 0
អត្ថបទត្រិះរិះ៖ «កុំធ្វើខ្លួនឱ្យដូចរស់នៅក្នុងប៉ាឆាកប់សព»
ចន្លោះមិនឃើញ
អត្ថបទនេះមិនសំដៅលើបុគ្គលណាឱ្យពិតប្រាកដទេ យើងក៏មិនខ្វល់ថាអ្នកជានរណា ខ្មៅឬស មានភេទអ្វី ឬអាយុប៉ុន្មានដែរ យើងគ្រាន់តែដឹងថា អ្នកច្បាស់ជាមានក្តីប្រាថ្នាអ្វីមួយដែលដក់ជាប់ក្នុងខួរក្បាល បេះដូង ព្រមទាំងរាងកាយទាំងមូល។ ប៉ុន្តែយើងដឹងថាអ្នកមិនបានបញ្ចេញវាឱ្យពិភពលោកបានឃើញទេ អ្នកភ័យខ្លាចហើយព្យាយាមលាក់វាទុកក្នុងចិត្ត និងតែងតែរកលេសដើម្បីគេចពីវា។ ហេតុអ្វីទៅ? ឬក៏អ្នកគិតថាពិភពលោកប្រហែលជាមិនទទួលស្គាល់មែនទេ ឬក៏មានមនុស្សមួយចំនួនប្រាប់អ្នកថា «ឈប់រវើរវាយទៀតទៅ ត្រូវរស់នៅក្នុងសភាពខ្លួនឯងពិតប្រាកដ»។ មិនបដិសេធទេ ពេលនេះអ្នកកំពុងរស់នៅក្នុងសភាពខ្លួនឯងពិតប្រាកដមែនហើយ តែបើសង្កេតក្នុងក្រអៅបេះដូងវិញ គឺអ្នកកំពុងមានអារម្មណ៍ថាមិនបានរស់នៅដោយថាមពលពេញទំហឹងឡើយ និយាយឱ្យអាក្រក់ស្តាប់បន្តិចគឺរស់កំដរថ្ងៃស្លាប់ មានអីក៏ធ្វើហ្នឹង ស្រួលបែបណាក៏បន្តបែបហ្នឹង។
ឧទាហរណ៍សាមញ្ញមួយ តើអ្នកដឹងថាកន្លែងណាដែលមនុស្សអាចរស់នៅដោយស្តុកស្តម្ភ និងមានក្តីសុខជាងគេក្នុងពិភពលោកដែរទេ? មិនមែនឌូបៃ មិនមែនសាំងហ្គាពួរ ឬអារ៉ាប់ ឬប្រទេសផ្សេងៗទៀតទេ គឺ« ប៉ាឆា (កន្លែងកប់សព)»។ បើអ្នកបានទៅនៅទីនោះគ្មាននរណាហ៊ានមកឈ្លានពានឡើយ អ្វីគ្រប់យ៉ាងសុទ្ធតែស្ងប់ស្ងាត់ អ្នកអាចស្ថិតក្នុងភាពស្តុកស្តម្ភនិងសុខស្រួលបានហើយ។ ចុះបើស្ងប់សុខអ៊ីចឹងហើយហេតុអ្វីមនុស្សបែរនាំគ្នាខ្លាចរអារមិនចង់ទៅទីនោះវិញ?
តាមរយៈសំណួរមួយនេះ យើងកំពុងចង់ប្រាប់អ្នកថា ចូរកុំបណ្តោយឱ្យជីវិតរស់នៅសព្វថ្ងៃដូចនឹងជីវិតនៅក្នុងប៉ាឆាអី កុំចង់ស្រួលឬផ្តេកផ្តួលតាមយថកម្មពេកកុំចាំថ្ងៃស្អែក ស្អែកហើយស្អែកទៀត ត្រូវចាប់ផ្តើមខំប្រឹងដើម្បីក្តីស្រមៃខ្លួនឯងពី«ពេលនេះ ឥលូវនេះ»។ គ្មាននរណាទាយដឹងពីអនាគតទេ អ្នកអាចទទួលមានលទ្ធផលពីរគឺសម្រេចនិងមិនសម្រេចប្រសិនបើអ្នកចាប់ផ្តើមធ្វើរឿងគ្រប់យ៉ាងដើម្បីក្តីស្រមៃនោះ ប៉ុន្តែបើរវល់តែខ្លាចមិនហ៊ានធ្វើ អ្នកនឹងគ្មានថ្ងៃបានសម្រេចឡើយ។ ចូរចាំថាគ្រប់យ៉ាងសុទ្ធតែអាចកើតឡើងបាន បើអ្នកធ្វើតាមអ្វីជាការតាំងចិត្ត! ចូរធ្វើជាខ្លួនអ្នកពីពេលនេះ ហើយដើរតាមក្តីស្រមៃរបស់អ្នក៕
ចុចអាន៖១២មេរៀនចាក់ដោតដួងចិត្តពីអ្នកប្រឡូកការងារជិត១០ឆ្នាំ
© រក្សាសិទ្ធិគ្រប់យ៉ាងដោយ Quantum News ឆ្នាំ២០២៥
អាសយដ្ឋាន
N/A
Quantum Tech News
