ចេះរៀបចំពេលវេលាបានដូចនេះ ២៤ម៉ោងដឹងតែមិនចេះស្ត្រេស និងអស់កម្លាំងម៉ង

2018-01-25 03:37:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អារម្មណ៍ហត់នឿយព្រោះការងារ ភាពតានតឹងនឹងបញ្ហាផ្សេងៗបានធ្វើឱ្យមនុស្សជាច្រើន ជាពិសេសនារីៗមានសុខភាពមិនសូវរឹងមាំ។ កត្តាទាំងនេះបណ្ដាលមកពីការមិនបានគ្រប់គ្រងពេលវេលា និងបែងចែកវាឱ្យច្បាស់លាស់ ទើបរយៈ២៤ម៉ោងក្នុងមួយថ្ងៃ អ្នកទទួលអារម្មណ៍ថាអស់កម្លាំង និងមិនបានសម្រាកទាល់តែសោះ។ ថ្ងៃនេះ កញ្ញាសូមណែនាំវិធីសាមញ្ញៗមួយចំនួនដែលជួយឱ្យមិត្តនារីយើងមានអារម្មណ៍ធូរស្បើយពីភាពខ្វល់ខ្វាយ និងភាពស្មុគស្មាញដែលធ្លាប់តែកើតមាន។

ម៉ោង៦ព្រឹក៖ ក្រោកពីគេង

យោងតាមគ្រូពេទ្យជំនាញដែលតែងឱ្យដំបូន្មានថា ពេលវេលាម៉ោង៦ព្រឹកគឺជាពេលល្អបំផុតសម្រាប់ក្រោកពីដំណេក ដើម្បីស្រូបយកកម្ដៅព្រះអាទិត្យ និងទទួលថាមពលសម្រាប់ថ្ងៃថ្មី។ ពន្លឺថ្ងៃនាពេលព្រឹកព្រលឹមនេះអាចជួយឱ្យសុខភាពអ្នករឹងមាំ និងស្រស់ស្រាយផ្នែកអារម្មណ៍។

ម៉ោង៦កន្លះព្រឹក៖ ហាត់ប្រាណ

ការបញ្ចេញសកម្មភាពខ្លះដើម្បីឱ្យបែកញើសក្នុងវេលានេះគឺមានប្រយោជន៍ណាស់ ដូចជាការធ្វើ Yoga ការរត់តិចៗ ឬលើកដៃលើកជើងឱ្យសរសៃសសូងដំណើរការបានស្រួល។ ហើយបន្ទាប់ពីហាត់ប្រាណរួច អ្នកគួរញ៉ាំអាហារពេលព្រឹក ដោយបន្ថែមជាមួយយ៉ាអួ ឬស៊ុតស្ងោរមួយគ្រាប់។

ម៉ោង៧ព្រឹក៖ ចេញដំណើរមកធ្វើការ

បើអ្នកធ្វើដំណើរដោយយានជំនិះផ្ទាល់ខ្លួន អ្នកអាចបើកតាមសម្រួល ជាជាងបង្ខំហើយមួម៉ៅជាមួយការស្ទះចរាចរណ៍ ព្រោះការខឹងសម្បារមិនអាចធ្វើឱ្យចរាចរណ៍លែងស្ទះ តែវាបែរជាធ្វើឱ្យទ្រូងរបស់អ្នកកាន់តែស្ទះខ្លាំងទៅវិញទេ។ ចំណែកអ្នកដែលជិះឡានក្រុង ឬមធ្យោបាយធ្វើដំណើរសាធារណៈអាចឆ្លៀតពេលអានព័ត៌មានពេលព្រឹក ឬអានកាសែតលំហែខួរក្បាលបាន។ ប៉ុន្តែបើអ្នកត្រូវជិះតាមបណ្ដោយផ្លូវដែលមានចរាចរណ៍កកកុញខ្លាំង គួរជ្រើសរើសពេលព្រលឹមជាងនេះដើម្បីធ្វើដំណើរ ជាជាងចេញពីផ្ទះយឺតចំតែម៉ោងកកស្ទះ ហើយទៅធ្វើការមិនទាន់ម៉ោង។

ម៉ោង៩ព្រឹក៖ ចាប់ផ្ដើមផ្ដោតអារម្មណ៍តែលើការងារ

ម៉ោងនេះជាពេលល្អក្នុងការបំពេញការងារ ព្រោះខួរក្បាលរបស់អ្នកអាចមានភាពច្នៃប្រឌិតច្រើន និងមានកម្លាំងធ្វើការក្រោយពីទទួលបានជីវជាតិនៃអាហារពេលព្រឹក។ ដូច្នេះ គួរឈប់អូសចុះឡើងលើបណ្ដាញសង្គម ឬលេងសារ ឬជជែកលេងឥតប្រយោជន៍ជាមួយមិត្តភ័ក្ដិសិន ហើយមកផ្ដោតអារម្មណ៍លើការងារវិញ។

ម៉ោង១២ថ្ងៃ៖ ញ៉ាំអាហារថ្ងៃត្រង់

ដល់ពេលវេលាដែលត្រូវសម្រាកនិងបញ្ចូលកម្លាំងធាតុដល់រាងកាយរបស់អ្នកហើយ។ បើអ្នកមានពេលវេលាច្រើន គួរចំណាយពេល៥នាទីពត់ពែនខ្លួន ឬលើកដៃលើកជើងដើម្បីកាត់បន្ថយភាពតានតឹងនិងស្ពឹកស្រពន់ព្រោះការអង្គុយធ្វើការពេញមួយព្រឹក។ គួរជ្រើសរើសអាហារណាដែលមានជីវជាតិល្អសម្រាប់រាងកាយ ព្រោះអ្នកនឹងត្រូវចំណាយកម្លាំងធ្វើការមួយកំណាត់ថ្ងៃទៀត។

ម៉ោង៣រសៀល៖ ជម្នះភាពងោកងុយ

បន្ទាប់ពីបាយថ្ងៃរួច ពេលរសៀលគឺជាដែលត្រូវប្រឈមនឹងអារម្មណ៍ងងុយគេង។ ដូច្នេះដើម្បីជម្នះនូវអារម្មណ៍ងោកងុយនេះអ្នកអាចសម្រាកដោយបិទភ្នែកពីរបីនាទី ដោយដើរទៅបន្ទប់ទឹក ឬជជែកលេងជាមួយមិត្តភក្ដិមួយសន្ទុះ ជាជាងការផឹកភេសជ្ជៈប៉ូវកម្លាំងដើម្បីបំបាត់ភាពងងុយគេង។

ម៉ោង៦ល្ងាច៖ បញ្ចប់ការងារឱ្យរួចរាល់

ធ្វើការពេញមួយថ្ងៃ រាងកាយអ្នកច្បាស់ជាហត់ហេវ ត្រូវការការសម្រាកជាចាំបាច់។ ដូច្នេះគួរបញ្ចប់ការងារឱ្យបានរួចរាល់ ហើយក្រោកចេញមកផ្ទះជាមួយអារម្មណ៍ជ្រះស្រឡះ ជាជាងនៅដិតដាមនឹងការងារដែលនៅគរដូចភ្នំ។

ម៉ោង៧ល្ងាច៖ ញ៉ាំអាហារពេលល្ងាច

គ្រប់គ្នាសុទ្ធតែដឹងថា ការញ៉ាំអាហារពេលល្ងាចយឺតគឺមិនល្អសម្រាប់សុខភាព ប៉ុន្តែមនុស្សមួយចំនួននៅតែមិនយកចិត្តទុកដាក់។ រយៈពេលល្អបំផុតសម្រាប់អាហារពេលល្ងាច គឺ៣ម៉ោងមុនចូលគេង ដើម្បីឱ្យក្រពះបានរំលាយអាហារបានល្អ។ បើអ្នកចង់ឱ្យគេងបានលក់ស្រួលពេញមួយយប់ គួរជ្រើសយកអាហារប្រភេទសាច់ត្រី នំប៉័ងស្រូវសាឡី យាអួរ ឬផ្លែចេក។

ម៉ោង៩យប់៖ សម្រាក

ពេលវេលានេះ រាងកាយរបស់អ្នកត្រូវការការសម្រាក លំហែ ដូច្នេះអ្នកអាចងូតទឹកក្ដៅឧណ្ហៗ ឬផឹកតែក្ដៅៗមួយពែងដើម្បីជួយសម្រួលការគេងបានទៀតផង។ ពេលនេះដែរ អ្នកគួរនៅឱ្យឆ្ងាយពីគ្រឿងអេឡិចត្រូនិកនានា ដូចជាទូរសព្ទ ឬទូរទស្សន៍ជាដើម។ ជំនួសមកវិញ អ្នកអាចអានសៀវភៅ ព្រោះវាជួយឱ្យរាងកាយអ្នកសម្រាកបានស្ងប់ពេញមួយយប់។

ម៉ោង១០យប់៖ ចូលគេង

ដល់ម៉ោងចូលគេង អ្នកគួរតែសម្ងំគេង ជាជាងធ្វើនេះធ្វើនោះ។ ប៉ុន្តែទោះបីអ្នកព្យាយាមគេងយ៉ាងណា បើបន្ទប់គេងរញ៉េរញ៉ៃ ឬមានក្លិនមិនល្អ ក៏អាចរំខានដល់ដំណេកបានទៀតផង។ អ្នកគួររៀបចំបន្ទប់ឱ្យមានសណ្ដាប់ធ្នាប់ ដាក់ផ្កាក្រអូបៗក្នុងនោះ ហើយដាក់អំពូលដែលមានពន្លឺស្រទន់ៗ និងបើកចម្រៀងរងំៗដើម្បីឱ្យការគេងលក់កាន់តែស្រួល៕

ចុចអាន៖

ប្រភព៖ kanha ប្រែសម្រួល៖ pkhen

អត្ថបទពេញនិយម

អត្ថបទថ្មី

ហេតុផល ៧ យ៉ាងបញ្ជាក់ថាស្នេហាលើកទី ២ ជោគជ័យជាងស្នេហ៍គ្រាដំបូង

អញ្ចឹងតើបានសម្រកខ្លាញ់ក្បាលពោះមិនស្រកសោះ!

ចង់ប្រាប់ថា «អត់ស្រឡាញ់ទេ» តែដូចត្រង់ពេក មានវិធីអីល្អ?

ស្រីៗចង់បានក្រចកដុះលឿន វែង និងរឹងមាំ ១០ វិធីនេះអាចជួយបាន

ជឿទេថាកាយវិការងាយៗទាំងនេះអាចបំបាត់ស្ត្រសត្រឹម២នាទីប៉ុណ្ណោះ?

ក្លិនមាត់មិនល្អធ្វើដូចម្តេច?

ប្រជ្រុយ ៦ កន្លែងលើខ្លួនមនុស្សស្រីឆ្វាក់បុរស និងនាំសំណាងបំផុត